Yula.la ຂ່າວ

ບາງທ່ານທີ່ກຳລັງຈະຊື້ລົດເປັນຄັ້ງທຳອິດອາດຈະຍັງບໍ່ຮູ້ວ່າຄ່າໃຊ້ຈ່າຍຕ່າງໆທີ່ກ່ຽວກັບລົດມີຫຍັງແດ່ ເຊິ່ງທ່ານອາດຈະຕ້ອງເກັບເງິນໄວ້ສ່ວນໜຶ່ງໄວ້ໃຊ້ຈ່າຍໃນສ່ວນນັ້ນ

ມື້ນີ້ເຮົາຈະພາທ່ານໄປຮູ້ຈັກກັບຄ່າໃຊ້ຈ່າຍຕ່າງໆທີ່ທ່ານຕ້ອງຈ່າຍເມື່ອໄດ້ລົດຄັນໃໝ່

1. ນ້ຳມັນລົດ

ນ້ຳມັນລົດຖືວ່າເປັນສິ່ງທີ່ຈຳເປັນຕໍ່ລົດຂອງທ່ານໃນແຕ່ລະເດືອນ ທ່ານອາດຈະໄດ້ເຕີມນ້ຳມັນທຸກອາທິດ ຫຼື  ທຸກເດືອນ ຂຶ້ນຢູ່ກັນພຶດຕິກຳການຂັບລົດຂອງທ່ານ. ປັດຈຸບັນກໍ່ມີລົດທີ່ຜະລິດອອກມາໃຫ້ປະຍັດນ້ຳມັນເຊັ່ນລົດໄຮບຣິດ (Hybrid) ໃຫ້ຄົນໄດ້ຊົມໃຊ້

2. ຄ່າປະກັນໄພ

ປະກັນໄພລົດໃນລາວມີຫຼາຍແບບ ຫຼາຍຊັ້ນລຳດັບໃຫ້ທ່ານເລືອກຕາມທີ່ເໝາະສົມກັບລົດຂອງທ່ານ ແຕ່ຖ້າຫານທ່ານປະສົບອຸບັດຕິເຫດນອກເໜືອຈາກການຄຸ້ມຄອງ ທ່ານຈຳເປັນຕ້ອງຈ່າຍສ່ວນທີ່ເກີນອອກມາດ້ວຍຕົວເອງ (ເຊັ່ນຖືກຕຳແລ້ວໜີ ແລ້ວບໍ່ສາມາດຫາຄູ່ກໍລະນີໄດ້)

3. ຄ່າເຕັກນິກແລະຄ່າທຳນຽມທາງ

ຄ່າເຕັກນິກແລະ ຄ່າທຳນຽມທາງຂອງລົດແມ່ນຂຶ້ນຢູ່ກັບຂະໜາດຂອງລົດ ສົມມຸດວ່າທ່ານມີລົດປະເພດລົດເກັງ ມີຄວາມແຮງ 1,600 ຊີຊີ ທ່ານກໍ່ຈະໄດ້ຈ່າຍ 150,000 ກີບ ສ່ວນຄ່າເຕັກນິກສຳລັບປະເພດລົດ ແມ່ນ 100,000ກິບ

4. ຄ່າບຳລຸງຮັກສາຕາມໄລຍະທາງ

ປົກກະຕິເມື່ອຂັບຂີ່ໄດ້ຄົບກຳນົດໄລຍະທາງແລ້ວ ທ່ານຕ້ອງເອົາລົດໄປເຂົ້າສູນເພື່ອກວດກາ ເພື່ອໃຫ້ລົດໃຊ້ງານໄດ້ປົກກະຕິ ເຊິ່ງຄ່າໃຊ້ຈ່າຍກໍ່ຂຶ້ນຢູ່ກັບຂະໜາດຂອງລົດ ແລະກໍ່ຂຶ້ນຢູ່ກັບວ່າໄລຍະນັ້ນມີອາໄຫຼ່ສ່ວນໃດທີ່ຕ້ອງປ່ຽນໜ້ອຍຫຼາຍຊ່ຳໃດ

5. ຄ່າບຳລຸງ

ນອກຈາກຄ່າບຳລຸງຮັກສາແລ້ວຕາມໄລຍະທາງແລ້ວນັ້ນ ຫາກມີອາໄຫຼ່ສ່ວນໃດຂອງລົດເກີດຄວາມເສຍຫາຍຫຼືເສື່ອມສະພາບຈາກການໃຊ້ງານ ກໍ່ຈຳເປັນຕ້ອງປ່ຽນອະໄຫຼ່ ເພື່ອໃຫ້ລົດໃຊ້ງານປົກກະຕິ ຫາກລົດຂອງທ່ານຍັງຢູ່ໃນຊ່ວງຮັບປະກັນກໍ່ຈະໄປປ່ຽນອາໄຫຼ່ໂດຍບໍ່ເສຍຄ່າໃຊ້ຈ່າຍ ແຕ່ຖ້າຫາກເປັນອາໄຫຼ່ອື່ນໆ ຫຼືໝົດປະກັນແລ້ວ ທ່ານຈະຕ້ອງໄດ້ຂ່າຍຄ່າອາໄຫຼ່ແລະຄ່າແຮງນຳ ໂດຍສ່ວນຫຼາຍອາໄຫຼ່ທີ່ຕອງປ່ຽນເລື້ອຍໆແມ່ນແບັດເຕີລີ, ໃບປັດນ້ຳຜົນ ຫຼື ຢາງລົດເປັນຕົ້ນ

6. ຄ່າດູແລຮັກສາ

ເປັນການດູແລຮັກສາລົດໃຫ້ເບິ່ງໃໝ່ຢູ່ສະເໝີ ເຊັ່ນລ້າງລົດ, ຂັດສີລົດ, ເຄືອບສີ-ເຄືອບແກ້ວ ຮ່ວມໄປເຖິງສິນຄ້າອື່ນທີ່ຊື້ມາໃຊ້ກັບລົດເຊັ່ນ ສະບູ່ລ້າງລົດ ນ້ຳຢາເຄືອບເບາະລົດ ເຄື່ອງດູດຝຸ່ນ ເຊິ່ງພໍມາເບິ່ງຄ່າໃຊ້ຈ່າຍສ່ວນນີ້ໃນແຕ່ລະປີກໍ່ບໍ່ໜ້ອຍເລີຍ

ຖ້າຫາກທ່ານກຳລັງຈະຊື້ລົດຄັນທຳອິດ ຢ່າລືມພິຈາລະນາຄ່າໃຊ້ຈ່າຍທີ່ຕາມມານຳເດີ້ 

ບົດຄວາມໂດຍ : ວະນິດາ ສຸວັນນະວົງ